قارئین ! چونکہ رمضان المبارک کے رحمتوں‘ برکتوں بھرے مہینے میں ہم ہر لمحہ عنایات ربی سمیٹ رہے ہیں‘اس شفائی مہینے میں ہر سانس کے ذریعے ڈھیروں روحانی و جسمانی بیماریاں اپنے اندر سے نکالتےہیں اور شفاء اپنے پھیپھڑوں میں بھرتے ہیں‘ اس میں تو کوئی شک ہی نہیں ہے کہ رمضان المبارک شفاء کا‘ عطاکا‘کرم کامہینہ ہے۔ آئیے! اس مبارک مہینے میں میں آپ کی توجہ ایک ایسے ہی مبارک پھل کے مشروب کی طرف مبذول کرواتا ہوں‘ جس کےبے شمار فوائد اور بھرپور انرجی ڈرنک ہے‘ جسے میرے اور آپ کے آقا حضور نبی کریم ﷺ نے بھی نوش فرمایا۔جی ہاں وہ کچھ اور نہیں ’’کھجور ‘‘ ہے جسے آپ سحری و افطاری میں خوب کھارہے ہیں ۔ یہ کھجور کا انرجی ڈرنک کیسے بنتا ہے؟ اور اس کے کیا فوائد ہیں پڑھیے ‘ بنائیے‘ پیجئے پلائیے‘ خود اورنسلوں کو صحت مند‘ طاقتور‘ ذہین اور پہلوان بنائیے۔ قارئین!کھجور سارے انبیاء علیہ السلام کی سنت ‘سارے صحابہ اہل بیت رضوان اللہ علیہ اجمعین‘ اولیاء صالحین رحمہ اللہ علیہ کی سنت ہے اور سب سے بڑی بات یہ ہے کہ اس کے اندر شفاء کی وہ حقیقتیں ہیں جو انسان کو مصنوعی اور کیمیکل بھری ادویات کی طرف جانے نہیں دیتیں۔ آئیں! ہم ذرا کھجور کا شربت آپ کی خدمت میں پیش کرتے ہیں کہ رمضان میں اس سے بھرپور لطف اٹھائیں۔ اس کے فوائد تو بے شمار ہیں مگر بنانے کی ترکیب بالکل آسان ہے‘ حدیث مبارکہ میں اس کو ’’نبیذ‘‘ کے نام سے پکارا گیا ہے۔ نبیذ کیسے بنتی ہے جان لیجئے!
نبیذ بنانے کا طریقہ: حسب مقدار کھجور لیکر شام کو (اگر کھجوریں خشک ہوں تو ان کو چھوٹے چھوٹے ٹکڑے کرلیں اور گٹھلیاں نکال دیں) پانی میں بھگو دیں یعنی اگر کھجور ایک پائو ہو تو اس میں پانی تقریباً دو کلو ہو۔ صبح سحری کے وقت اٹھ کر کھجور کو ہاتھوں سے ملیں ‘ملتے ملتے تمام کھجور اور اس کے ریشے پانی میں حل ہوجائیں گے‘ جی چاہے چھان لیں اور نوش جان کریں‘ ورنہ بغیر چھانے بھی استعمال کرسکتے ہیں۔ اگر کھجوریں تازہ ہوں تو انہیں مت توڑیں اور ثابت ہی بھگودیں صبح اٹھ کر مل چھان کر یا مل کر گٹھلیاں نکال دیں اور نوش کریں۔ چاہیں تو کھجور کے شربت میں دودھ بھی ملا سکتے ہیں اس طرح اس کی افادیت بھی بڑ ھ جاتی ہے اور جنت کے دو میوے یعنی دودھ اور کھجور اکٹھے ہوجاتے ہیں۔ صحابہ کرام رضوان اللہ علیہم اجمعین کی زندگی میں اکیلا کھجور کا شربت پینا بہت زیادہ ثابت ہے۔ احتیاط: نبیذ کا شربت بنا کر اگر گرمی کا موسم ہے ٹھنڈی جگہ یا فریج میں رکھیں۔ صبح کا بھگویا ہواشام کو استعمال کریں اور شام کابھگویا ہواصبح استعمال کریں اگر فریج میں رکھیں تو خراب نہیں ہوتا لیکن احتیاطاً 12گھنٹے سے زیادہ نہ رکھیں۔ بھگونےکے ایک گھنٹے بعد گرائینڈ کرکے بھی فوری استعمال کرسکتے ہیں۔ ایک دن گزرنے سے اور شدید گرمی سے اس کے اندر خمیر پیدا ہوتا ہے اور خمیر کا پیدا ہوجانا اس کے استعمال کو مشکوک بنادیتا ہے۔ لہٰذا کوشش کریں اس کو تازہ ہی استعمال کریں۔کھجور کا شربت پینے سے جہاں قلب و جگر کی تسکین ہوتی ہے وہاںکھجور کا شربت خود ہیپاٹائٹس‘ معدے کی تیزابیت‘ پیاس کی شدت‘ ہاتھ پائوں کی جلن‘ منہ کی خشکی‘لعاب دہن کا کم ہونا‘ پیشاب کی جلن اور قبض کا خود بہترین علاج ہے‘ ایسے لوگ جو کسی بھی ہٹیلی پیچیدہ مرض میں مبتلا ہوں اور روزہ رکھنے سے قاصر ہوں۔ وہ مایوس اور پریشان نہ ہوں ۔حضرت ابوقتادہ رضی اللہ عنہ سے روایت ہے کہ نبی کریم ﷺ نبیذ بنانے کیلئے خشک اور کچی کھجور ‘خشک انگور اور خشک کھجور کے ملانے کچی اور تر کھجور کے ملانے سے منع فرمایا اور فرمایا ہر ایک سے الگ الگ نبیذ بنائو۔ (رواہ مسلم)۔ جدید سائنس کھجور کے متعلق کیا کہتی ہے چند فوائد یہ بھی پڑھ لیجئے:۔تازہ پکی ہوئی کھجور کا مسلسل استعمال خون کثرت سے آنے والی بیماری میں فائدہ مند ہے۔ یہ کیفیت غدودوں کی خرابی‘ جھلیوں کی سوزش، غذائی کمی اور خون میں فولاد کی کمی وغیرہ سے پیدا ہوسکتی ہے۔ کھجور ان میں سے ہر ایک کا مکمل علاج ہے۔دل کے دورے میں کھجور کو گٹھلی سمیت کوٹ کر دینا جان بچانے کا باعث ہوتا ہے چونکہ دل کا دورہ شریانوں میں رکاوٹ سے پیدا ہوتا ہے۔ اس لیے شریانوں میں رکاوٹ کے باعث پیدا ہونے والی تمام بیماریوں میں کھجور کی گٹھلی تریاق کا اثر رکھتی ہے چونکہ کھجور رافع قولنج اور جھلیوں سے سوزش کو دور کرنے کیلئے مسکن اثرات رکھتی ہے اس لیے دمہ خواہ وہ امراض تنفس سے ہو یا دل کی وجہ سے اسے دفع کرتی ہے۔